Problemet e sigurisë në trafik në fshatin Raushiq

FIQ bashkë me Saferworld kanë zhvilluar dy vite më parë projektin për siguri në komunitet në fshatin Raushiq. Një nga problemet e këtij komuniteti, ende i pazgjidhur është rreziku për nxënësit në rrugën magjistrale. FIQ dhe Saferworld kanë zhvilluar më pas aktivitete pasuese në këtë komunitet për të nxitur institucionet qendrore në zgjidhjen e këtij problemi.

Me datën 25 Janar 2010 u mbajt debati me temën “Problemet e sigurisë në trafik në fshatin Raushiq” që si për qëllim kishte:
-    Të diskutohet me përfaqësues të qeverisë komunale dhe institucione tjera si: MPB, MTPT dhe PK dhe të rishqyrtohen problemet e sigurisë në trafik në fshatin Raushiq të Pejës
-    Të identifikohen institucionet me të cilët kërkohet bashkëpunim si dhe të gjendet rruga më e përshtatshme për zgjidhjen e kësaj çështje
-    Të përcaktohen afatet kohore dhe çfarë duhet ndërmarrë për të punuar drejt zgjidhjes së problemit.
 
Pjesëmarrësit në debat ishin: Këshilli i Fshatit, Ministria e Punëve të Brendshme, Policia e Kosovës, OSBE, drejtoria Komunale e Arsimit, Drejtoria Komunale e Shërbimeve Publike dhe Punëve Teknike të cilët kanë mbështetur komunitetin për problemin dhe janë zotuar që të bëjnë presion tek Ministria e Transporteve dhe donatorë tjerë për të ofruar zgjidhje të përhershme.

Ndër të arriturat nga debati konsiderohet të jetë vazhdimi i avokimit për komunitetin e Raushiqit për të evituar pasigurinë në trafik dhe nxitjen e institucioneve për të investuar në nënkalimin dhe infrastrukturën përcjellëse të sigurisë në rrugë.